انا اوقات بحس انى قريبه من ربنا اوى .. لما بزعل بقعد احكيله .. ولما بفرح بقعد اشكره .. انما دلوقت حاسه بجد انى بعيده عن ربنا شويه .. بقول يمكن عشان الامتحانات ملخبطه معايا ومش مركزه فى حاجه .. بس برجع اقول حرام كدا
وبعدى عن ربنا بدأ يتلاحظ فى كل حاجه عندى الايام دى .. انا زعلانه ومدايقه جدا
لما بحس انه فيه حاجه بيبقى من جوايا مقتنعه بكدا جدا وببقى خايفه اوى .. كمان فيه حاجات بتحصل فى يومى العادى بتثبتلى قد ايه ربنا زعلان منى وقد ايه انا بجد بعيده عنه
يعنى لما ابقى مذاكره كويس جدا .. وتقريبا كل حاجه تمام فى الامتحان العملى .. واصلا الاسئله بتبقى معروفه بس بندخل نوصل بقى الحاجات وكدا .. وادخل جوه ومفكره انى هحل كويس .. الاقى ربنا سبحان الله عامل حاجات مش عارفه ليه .. بس اكيد لسبب عنده .. الاقى الجهاز اللى بعمل عليه الشغل مش واصله نت ولازم النت فى الشغل..
وبعدما الوقت يخلص ويجى المعيد يقولى مقولتيش ليه من اول الامتحان لازم تنقصى فى الدرجات
بجد انا وقتها والله ما فكرت فى اى حاجه ولا درجات ولا معيد ولا اى حاجه غير ان ربنا بجد زعلان منى .. وانى اكيد بعمل حاجه مش صح معاه .. وخلصت الامتحان وقعدت اعيط واسأل نفسى ياربى فى ايه ؟ انا كنت مذاكره وكله تمام واروح الاقى حظى الوحش موجود فى ان الجهاز يبوظ فى المعمل
سكت وقولت اكيد ربنا سبحانه وتعالى ليه حكمه فى كدا .. يمكن هو عمل كدا عشان ممكن انا مكونش ذاكرت كويس زى واحده تانيه زميلتى مثلا .. فلازم يميز اللى ذاكر عن اللى مش ذاكر اوى .. سبحان الله اكيد له حكمه فى كدا
ورضيت وخلاص ..
غير كدا كمان انا فيه ناس فى حياتى .. لما بزعل معاهم بحس بجد ان ربنا غضبان عليا .. ودلوقت فى الايام دى .. الناس دول مش بكلمهم ولا بيكلمونى .. بجد ربنا مش حاببنى دلوقت
يارب انت عارف ان مش فيه حد بشكيله اى حاجه غيرك .. يارب مش تكون زعلان منى ..ولو فيه حاجه انا بعملها غلط يارب ساعدنى انى اعرف اصححها واعملها احسن
يارب قربنى منك تانى .. وصلح علاقتى بكل الناس .. انا مش بحب ابقى حاجه وحشه فى حياة حد
يارب انت العالم بحالى اكتر منى .. وانت اللى عارف انى محتجالك
لا اله الا انت سبحانك انى كنت من الظالمين
0 comments:
Post a Comment