فرح تعبانه كعادتها يعنى .. اكتر واحده اتعمل لها اشاعات فينا واكتر واحده حصلها كسور فى حتت كتير فى جسمها واكتر واحده راحت لداكتره واكتر واحده برضه عمرها ما تهدى ابدا ولازم تفضل تتنطط كدا وتلعب مع صحابها لعب غريب اساسا
وعمرها ما تسمع الكلام لو قلنلها هتتعبى او اقعدى بقى كفايه او اى حاجه .. ابدااااااااااا
واللى بيحصل كل مره هو هو .. تلعب وتتنطط .. بعدين تقع على اى حته فى جسمها او تتعور او اى حاجه متعبه وخلاص.. بعدين تيجى تعيط .. بعدين بابا يزعقلها انها مش بتسمع الكلام .. بعدين ناخدلنا على العياط والصوات بقى بتاع اسبوعين تلاته كدا على نفس الحال من الصراخ وخلاص
والاسبوعين دول موسم الرقبه بقى .. رقبتها معرفش مالها .. المهم انها بتوجعها وخلاص .. استشارنا دكتور ( عملنا اللى علينا يعنى ) وقال على العلاج وبنديها منه
تسكت بقى ؟!! .. لا طبعا .. دى عيبه حتى
لازم تصحى الصبح تحكى حكايه الوجع اللى فى رقبتها وتعيط وتصوت شويه
وبعد الظهر لازم قصه جديده للوجع .. وتعيط برضه وتصوت شويتين
وبليل نفس الحكاوى هيا هيا .. وتزود شويه عياط كمان وصويت
احنا بقى يعنى بجد مش عارفه نعمل ايه يعنى .. بابا اصلا مش هنا وانا واختى وهيا بس اللى موجودين
اللى تقريبا نقدر عليه ( على ما اعتقد يعنى ) هو اننا نهديها مثلا او نطمنها
فرح : انا تعبانه ورقبتى بتوجعى وكل ما احركها كدا توجعنى .. احركها كدا توجعنى ولما بقعد لوحدى من غير ما احركها برضه بتوجعنى وحاسه انها ............... وعاااااااااااااا
انا : معلش يا حببتى .. تعالى نتفرج على التليفزيون او اى حاجه عشان تنسى الوجع دا
فرح : معلش ؟؟؟ اعمل انا ايه بمعلش دى يعنى.. انتى بتسكتينى وخلاص!! ..انتى مش بتحبينى .. انتى بتكرهينى .. انتى عايزا تتفرجى على التليفزيون وخلاص انتى مش حاسه بيا انتى.... انتى .. انتى
___________
دى حاله من الرد بالايجاب لما اشتكت ليا وانا قولتلها معلش .. معلش دى جريمه فظيعه على فكرا
طيب نجرب الرد بالسلب كدا .. يمكن ينفع
___________
فرح : انا تعبانه ورقبتى بتوجعى وكل ما احركها كدا توجعنى .. احركها كدا توجعنى ولما بقعد لوحدى من غير ما احركها برضه بتوجعنى وحاسه انها ............... وعاااااااااااااا
أنا : اعمل ايه انا بس؟ انا مش عارفه اعمل حاجه اتصلى بماما قوليلها يا فرح عشان انا مش عارفه حاجه
فرح : طبعا مهو دا اللى عندك .. مهو انتى اصلا مش بتفكرى تعملى حاجه .. مهو اصلا انتى بتكرهينى ومش همك اتعب ولا لاء .. انتى اصلا.. انتى .. وانتى ... وانتى
___________
أستغفر الله العظيم يارب
يعنى اقولها معلش .. يبقى انا بكرهها وبسكتها وخلاص .. أقولها انا مش عارفه وروحى لحد يكون عارف .. يبقى برضه بكرهها ومش مهمته بحالها
ويالهوى بقى ساعات لما تتصل بماما بقى .. وماما اصلا مش شايفه اللى بيحصل هنا ولا ازاى بنعاملها .. ماما أهم حاجه انها سمعت فرح عماله تعيطلها فى التليفون ( وانا تعبانه وانا عيانه ومش بيهتموا بيا ) ودى بتبقى مهمة فرح انتهت على كدا .. وتبدأ بقى مهمه ماما والموبايل يبتدى ياخد جوله ما بينا انا واختى بقى
وبلاش اقول اللى بنسمعه بقىىىىىىىى .. كل ما تتخيلوا من عقاب نظير الجريمه الفظيعه اللى احنا واقعين فيها
واوعى حد فينا يفكر يكلم فرح نص كلمه بعد التليفون دا .. ابدااااااا
هتبتدى الاسطوانه المحفوظه بقى .. اسطوانه بتكرهينى .. حفظتها والله
انا بجد امبارح بليل وصلت لحاله من الجنون .. كل ما انطق بكلمه الاقى قصادها مسلسل طويل عريض بيشرحلى قمة الكراهيه اللى انا بكرهها ليها
لدرجة والله انى سكت نهائى .. وهيا عماله تشكى وانا فى حاله من الصمت المختلط بالجنون اللى بيميل على شويه وهخبطها بأى حاجه فى وشها
ومن هبلىىىىىىىى .. والله من هبلى .. قمت ال اتصل بماما اقولها انى زهقت من فرح واللى بتعمله .. يالهوووووووووووووووووى ياريتنى ما اتصلت اصلا .. الموبايل فى الاخر بعد المكالمه والخناق مش فاكره اترمى فين بالظبط بس احنا ادناه رميه فاكره انها كانت هتكسره فى الاخر
يارب صبررررررررررررررنى
بجد مش عارفه اعملها ايه .. وبقعد اقول ان الام اللى ربنا بيديها ابن معاق .. لو صبرت عليه .. دا لوحده بيدخلها الجنه علطول
يمكن فرح الحمد لله وبعد الشر عليها يعنى من المرض .. فهيا اخف حاله من الابن المعاق اد .. ولو صبرت عليها واتحملت يعنى أكيد هلاقى حاجه كويسه عند ربنا
يارب صبرنى بقى ويارب الاقى فى اخرتى حاجه قصاد انى بتحمل الشكاوى اللى مش بتخلص دى
وربنا يشفيكى يارب يا فرح
ورقبتك وبطنك وراسك ورجلك وعنيكى وركبتك وايديك و... و ... و... و ... و ... يخفوا ان شاء الله
